Arantxa eta Lander "Landa eremuko gurasoen elkarte bateko esperientzia eta esperimentua" tailerrean. |
Auritzen ospatu dira pasa den maiatzaren 5ean "Nafarroako Landa Eremuko Eskolen 2. Topaketak". Pirineoko herrixka hartara joan
ginen Gurasoen Elkarteko bost
kide: Ruben (eskolako zuzendaria), Ana, Mikel, Lander eta Arantxa. Gure haur txikiak,
Amina eta Manu, ere gurekin heldu ziren, eta primeran pasa zuren han bientzat
propio zegoen zaintzailearekin jolasean goiz osoan zehar. Hango eskolarekin
maitemindu egin ziren, eta ederki pasa zuten suteak itzaltzeko ura herrira
eramateko ubidean jolasean.
Lekarotzen izan ziren iazko topaketak, eta haiek
bukatuta Guraso Elkarteari gonbidapena egin ziguten aurtengoetan parte
hartzeko. Izan ere, aurten irakasle eta hezkuntza alorreko beste eragileez
gain, gurasook ere tokia izan dugu topaketa horietan. Landerrek eta Arantxak
goizeko tailer bat aurkeztu genuen, eta gure bizipenen berri eman genien han
bildutako hogeita bosten bat lagunei.
Gu beste tailer batzuetan egoteko aukera ere izan
genuen. Talde interaktiboei
buruzkoan, esaterako, Mendigorriako irakasleek praktikan azaldu ziguten nola
egiten dituzten dinamika horiek eskolan. Oso interesgarria izan zen haien
ikuspuntua. ‘Baratza: lur zoru emankorretik azaren tximeletara’ tailerra aberasgarria izan zen. Hartan Uxueko
irakasle batek argi azaldu zuen baratzaren inguruan sor daitekeen ikasteko
aukera zabala. Estatuko hainbat eta hainbat tokitan eta Nafarroako herri
batzuetan indarrean dagoen lanaldi jarraiaren esperientzia ere kontatu ziguten
Urrozko eskolako irakasleek eta gurasoek, eta dituen onurengatik oso kontuan
hartzeko aukera badela argi utzi zuten.
Gurasoen Elkartearen baitan azken urteetan egiten ari
garen gogoeten eta aurrera eramaten ari diren proiektuen inguruan hitz egin
genuen guk. Gurea azalpen pertsonala eta subjektiboa izan zen. Guretzat oso
baliotsua izan da, azken urteotan egindakoaren inguruan hausnarketa pixka bat
egiteko eta atzera begira jartzeko. Litekeena da laster han azaldutakoa hemen
bertan aurkeztea zuei guztiei, Gurasoen Elkartearen eta oro har hezkuntzaren
inguruan interesa duzuen guztiei. Eztabaidara eta hausnarketarako abiapuntu
interesgarria izan daitekeelakoan gaude.
benetan oso interesgarria izan zen, ea urrengo urterako antolatzen dugun ongi taller desberdinetan parte hartzeko.
ErantzunEzabatuMila esker Arantxa eta Lander.
Ana.